Վալենտինա Ներսիսյան

Վիքիպեդիայում կան հոդվածներ Ներսիսյան ազգանունով այլ մարդկանց մասին։

Վալենտինա Մկրտչի Ներսիսյան
Ծնվել է	հուլիսի 13, 1924(1924-07-13)
Ծննդավայր	Երևան, Հայկական ԽՍՀ, ԱԽՖՍՀ, ԽՍՀՄ
Մահացել է	2009
Մահվան վայր	Երևան, Հայաստան
Քաղաքացիություն	Հայկական ԽՍՀ և  Հայաստան
Ազգություն	հայ
Կրթություն	Երևանի պետական բժշկական ինստիտուտ
Մասնագիտություն	բժիշկ և արյունաբան
Գիտական աստիճան	բժշկական գիտությունների դոկտոր և պրոֆեսոր

Վալենտինա Մկրտչի Ներսիսյան (հուլիսի 13, 1924(1924-07-13), Երևան, Հայկական ԽՍՀ, ԱԽՖՍՀ, ԽՍՀՄ - 2009, Երևան, Հայաստան), հայ արյունաբան։ Բժշկական գիտությունների դոկտոր (1986), պրոֆեսոր (1996)։ Նյու Ցուրի (1996) և ՌԴ բնական գիտությունների (1999) ակադեմիաների անդամ։

Կենսագրություն

1947 թվականին Երևանի պետական բժշկական ինստիտուտի ավարտական քննությունները չհանձնած՝ անհիմն բռնադատվել և ծնողների հետ աքսորվել է ՌԴ Ալթայի երկրամաս։ 1954 թվականին արդարացվել է և ավարտել ինստիտուտը (1955)։ 1957 թվականից աշխատում է Ռուբեն Յոլյանի անվան արյունաբանության և արյան փոխներարկման գիտահետազոտական ինստիտուտում (1992 թվականից՝ Արյունաբանության կենտրոն), 1972 թվականից՝ իմունարայունաբանության բաժնի հիմնադիր-վարիչ, միաժամանակ՝ Հայկական բժշկական ինստիտուտի ամբիոնի վարիչ (1996 թվականից)։ 2000 թվականից եղել է ԱԱԻ պրոֆեսոր։

Գիտական աշխատությունները վերաբերում են արյան իմունավերարտադրողականության, իմունածագումնաբանության, նրա բաղադրամասերի փոխազդեցության և մարդաբանության խնդիրներին։ Հայաստանում առաջին անգամ ուսումնասիրել է հայերի արյան Եիթրոցիտային, լեյկոցիտային և շիճուկային համակարգերում տարբեր գործոնների հանդիպման հաճախականությունը բնականոն վիճակում և 13 տարբեր հիվանդությունների ժամանակ։ Հաստատել է, որ ԼՂՀ և տարբեր երկրների (Ֆրանսիա, Թուրքիա, Ռուսաստան, Լիբանան և այլն) հայերն ունեն միանման հակագենային հատկանիշներ և արյան իմունածագումնաբանական համակարգերի գործոնների և գեների հանդիպման հաճախականությամբ մոտ են եվրոպական երկրների (հատկապես Իտալիա, Իսպանիա, Հունաստան և այլն) պոպուլյացիաներին, իսկ ԼՂՀ-ում ապրող ադրբեջանցիները՝ ասիականին։ 1990-1994 թվականներին Ներսիսյանը Հայաստանում և ԼՂՀ-ում կազմակերպել է հարյուրավոր վիրավոր և հիվանդ ազատամարտիկների ու խաղաղ բնակիչների արյան փոխներափման և բուժսպասարկման աշխատանքներ։

Ավելի քան 350 մենագրությունների, ուսումնական ձեռնարկների և գիտական հոդվածների հեղինակ է։

Երկեր

1. Իմունա-սրտաբանական ստուգումներն արյան փոխներարկման և հղիության դեպքում, Ե., 2004։
2. Нерсисян В.М., Системы АВО и резус-фактор в клинике, Ереван, 1972.

Գրականություն

• Айриян А. П. Армянские учёные-медики. - Ер., 1998 - 276 с. ISBN 99930-1-001-7.

Ծանոթագրություններ

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Ղարաբաղյան ազատագրական պատերազմ (1988—1994) հանրագիտարանից, որի նյութերը թողարկված են՝ Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո ։